About Me

My photo
I long for freedom, and when I get it, I don't know what I'm going to do with it, but I will surely be happy.

Blog Archive

My Blog List

Monday, September 20, 2010


ام عمر الجميلة،
كنت بدي أكتبلك كومنت بس لقيت اني رح ألعي كتير و انا على كل حال كنت حابة أدوّن عن الموضوع
و أنا عم أدوّر عكلمات الأغنية لقيت هاي المدخلة ل
blabbr girl
بتحكي فيها عن الموضوع
جد كلماتها كتير كتير حلوة و حكت اللي بقلبي
بس برضو عندي حكي كمان

يمكن كلمات هالأغنية بتناسبك و بتشوفي انو حقو يحكي هالكلام
بس أنا برأيي المرأة هي اللب بتقرر شو اللي بيخليها حرة أو لأ،مش ييجي هاد الأناني يقرر عني شو اللي بدو يريحني و شو اللي ما بدو يريحني!بلكي انا حسيت انو بناسبني هالوضع؟
كيف بيتهمني بالتقصير و انا لسة ما جربت
و بعدين معناها ليش درست انا،عشان اقعد زي البؤجة فالبيت؟و هي الشهادات بتتاخد لتتعلق عالحيط؟
انا أؤمن ألف بالمية انو الرجل و المرأة انخلقوا يديروا بالهم عبعض و يكملوا بعض
بس هل هاد يعني اني اقعد في البيت جارية عند رجليه؟

لأ و أحلى ما فيها انو بيقوليلها بلكي المديير حبّك
ما عنده ثقة فيها،ولا مفكر الناس كل همها شهوتها متله؟ولا مش واثق انها ممكن تكون بروفشنال و خلوقة و قوية بما يكفي انها تكسب احترام هالمدير؟مش ذنبنا اذا متجوز وحدة قليلة ادب والله

و بصراحة انا استغربت لما قلتي"
هيه سمحلها تتعلم وتكمل دراسه لأخر حلقه"
يعني كأنو عامل اشي رهيب؟احنا مش بالقرن السادس عشر ليش ما تتعلم يعني؟لأنها مش ولد؟و ليش ليسمحلها؟بتتعلم غصب عن راسو!!!!
أنا بقدّر انك بني ادمة بتتعب بحياتها و بحترمك لهاد الاشي بس برضو يمكن انتِ ما بيناسبك هالاشي بس في نساء كتير موفقة بين شغلها و عيلتها و مرتاحة
انا أمي اشتغلت و تقاعدت من شي خمس سنين فقط،و عندها سبع اطفال متقاربين بالاعمار و تنين منهم توأم
و ما بتنكر انها تعبت،بس برضو هي فخورة بالانجاز اللي عملتو،انها ربت ولادها و هينا كلنا جامعات أو بنشتغل و الحمدلله احسن تربية..و بنفس الوقت انها ساعدت في النفقات و وقفت زيها زي بابا بدل ما تتفرّغ ل"قلبو و عاطفتو و حنانو"اللي هي هاي الشغلات اصلا بتختفي بعد شي سنتين زواج الصراحة

انا مش ناشطة لحقوق المرأة و بكره هاد الحكي تاع حق المرأة في انها تسوق قلّاب
ولا عم أقول انو كل مرأة ما بتاخد حقها إلا لما تشتغل
أنا ببساطة بحكي : مش هاد المعفّن اللي بيقرر عني شو اللي بدي أعملو بحياتي ولا هو اللي بيقرر شو اللي حق للمرأة و شو لأ تبعا لرغبته هو
لأ و بيقرر انة بيكفي انك رئيسة جمهورية قلبي..و كتير عليكي كمان
بالنهاية بهديكي هاي الأغنية رداّ على محمد اسكندر:



21 comments:

Wafa' said...

صحيح انها اغنية تافهة
(رأي الخاص طبعا)
بس للاسف تفكير كتير من الرجال كدا, مازالت النظرة قاصرة جدا و بشكل كبير للمرأة, مازالت نظرة انها عير عاقلة و غير مؤهلة
.
مالازم احد يقرر عن احد اي شيء بحياته

Um Omar said...

انا جميله :mal5oom:

شو الغلط اللي صاير,, الكل بتغزل فيني :sad:
حاسه حالي غلطانه فيكم

لا ياعمي,,انا إم عمر الشريره,, خليني شريره بلا ما أخد ف حالي مقلب :c2:

انا شايفه كل حدن اخد اللي بده إياه من " هالمعلقة الأثرية" وشاف اللي بقهره ودقر عليه
انحكى عنها كتير,, ومابتصور خلص الحكي ف نقدها وذمها

حلو رأيك,, بس لحد كلمه " معفن" وإنصدمت ,:mal5oom:

الإهداء إلي,, يا لهوي يا لهوي
وك,, شكله الأغنيه ردح,, ردح العاده,
لوووووووووووول

أشرف محيي الدين said...

رين يا رين :)

أنا صراحه مابدي أناقش بموضوع الاغنيه لأنو لفت انتباهي شغله كتير مهمه حكيتي عنها واللي هي انو العاطفه والحب بتختفي بعد سنتين زواج

يعني هذه الفكره دلالتها بتأكد مقولة إنو الحب مقبرته الزواج

وأعتقد أنو هذه القضية صارت مشكله اجتماعيه حقيقيه لابد من الوقوف على أسبابها وليش عم بتصير

أنا أؤمن كثيرا بمقولة إنو الحب الحقيقي يستمر دوما في البحث عن طرق جديدة للتعبير عن نفسه ولكن أن يختفي ؟؟

فجرتي تساؤلات كثيره بداخلي بهذه الفكره يا رين :)

كل الود

Um Omar said...

إضافه إضافه

انا قاااااااااادره لأخر نفس اوفق بين شغلي وبيتي وأولادي وإجتماعياتي
والحمدلله ماحدن علق ع تقصير صغير مني
سواءً بالشغل اللي رجعت ل وظيفه اكبر من اللي تركت منها
او في البيت,, او حتى في عيلتي

التعليق كان ليش رده هالفعل الغبيه لمى شب بيطلب من صبيه إنها تتفرغله وبإمكانه يعيشها بمستوى منيح؟

مش عني بحكي,, انا كنت ضد قعود البنت ف البيت,, اي انا إشتغلت وانا طالبه جامعيه وإشتغلت وانا بعدني بالتوجيهي كمان
وهلأ عم بشتغل بأكتر من شركه بنفس الوقت
ولاقيه الوقت الكافي للتوفيق بين كل هدول,,

Rain said...

وفاء
بالضبط هاد اللي عم أحاول أوصلو
لما تملي عالشخص شو يعمل حتى يكون حرّ فانت بتصادر حريتو مباشرة!!يعني زي لما يقولولي الحجاب بيقيدك و بيسرق حريتك...كأنهم ما عم يصادرو قراري باختيارو و بالتالي بيصادروا حريتي
الموضوع مناق لنفسه تماما

Rain said...

أم عمر
مش قصدي أبدا انتقدك لشخصك ولا قصدي انتقد رأيك كل حكيي كان عن الاغنية
أولا بعرف انك بتوفقي بين شغلك و حياتك و هاد اشي رائع و انتي فعلا انسانة جبارة اللي قدرتي تعملي هيك،بس كونك ما عندك مانع مع الاغنية أوحالي انك مش مرتاحة او تعبانة من هاد الوضع،و انتي حرة سواء كنتِ مرتاحة أو لأ
هاد قرارك قبل الكل...و هاد هو اللي عم احاول أوصلو:ليش هو يختار عنّي انا شو بيريحني؟؟

الاغنية مش ردح والله بالعكس،ردّ كتير حلو على اسكندر،و كلماتها حلوة

بالنسبة ل انو ردة الفعل غبية لما يطلب منها تتفرغله،هي حرة اذا عاجبها تتفرغله بس يعني شو هالانانية هاي؟ليش ما يكون عندها حياة؟
بدو يجيب بني ادمة لازم يستوعب انو هي عندها حياة غيرو،اما بدو وحدة لا شغلة ولا عملة إلا انها تنهوس فيه فيجيب بنت راسها فاضي و ما بتفكر اصلا بالشغل هيك بيريحنا و بيرتاح،و ما اكترهم عفكرة

برجع بقلّك،
انشالله ما تكوني اخدتي الموضوع بحساسية،و انا بعرف انك زوجة و أم و موظفة كل هاد و شخصيتك قوية و حبّابة و فهمانة،ماشالله عليكي...و عشان هيك اه انتي جميلة
^_^

Rain said...

اشرف يا اشرف!
:D
هاي قضية تانية تماما لول
والله أقلك اني بعرف؟لا والله بصراحة ما بعرف،بس أنا عم أشوف اللي حولي و هاد اللي لاحظته

بتمنى يكون الموضوع متل الافلام و الناس تعشق بعضها للأبد بس شكله الوضع مش هيك
انت قلّي شو رأيك؟شو هي الطرق اللي ممكن الحب يتعبر عنّه مع الزمن؟

عكلاً بس أتزوج بردلّك خبر
:P

أشرف محيي الدين said...

ما رح أقدر أأقلك إشي هلا لأنو يوم السبت انشالله عندي ادراج عشقي فلسفي من الآخر :)

بعتقد انو من خلالو رح نجاوب على كتير شغلات بهالخصوص :)

كل الود

Saleh said...

هاظ موضوع الأغنية شكله جدي و مهم للغاية، بصفتي أساسا مش سميع أغاني و ما إلي على هالشغلات ما قريت الموضوع (مثل موضوع إم عمر)، بس حبيت أقول إن كان الشعراء ربنا ذمهم، فما بالكم
بالمغنيين و المغنيات حتي تكون مواضيع أغانيهم مهمة و تصلح للنقاش

Rain said...

Ashraf,
LOOOL can't wait!

Saleh,
lol.
We cannot deny that such music has effect on society.Maybe YOU are not following,but you know what?not one day passes by without me hearing that song in a wedding,restaurant,or any other place
Denying the problem will not make it disappear
Besides,music is supposed to express our culture and way of thinking,maybe you do not believe that but I do
And personally,I love music so much,and no it is not considered something wrong to me.
ahlan feek Saleh:)

Um Omar said...

حساسيه,, :mal5oom:
شو مفكراني صف اول جيم إنتي :6::ag::ut:

بكرهك,, ماشي,, بكررررررررررررهك :c2:

انا عندي قاعده من زمان
الإختلاف في الرأي لا يفسد للود قضيه
وإنتي لا جيتي فيه ولا ذمتي فيه لا سمح الله,, احنا بنحكي عن " المعلقه الإسكندريه" اللي جابت الدور لللعالم

انا بس نقلت التذمر الي انا بعاني منه انا وكلللللللل صديقاتي الموظفات المتزوجات,, اللي معظمهم عم بتذمرو وما اجاهم خلفه,,

هوه بس إنه عم بندور ع راحتنا مش أكتر,, وتعب الشغل,, مش راحه بالمره

كل الود يا بطه,, ماصار شي هبوله :shy::give:

Saleh said...

Don't understand me wrong. I do listin to the music I like. But I don´t care if other compose some noise and call it music. Or if they put few rubbish words and call them songs. It is their business. But I never consider their topics serious enough to care about. Always you come accross that nonsense. And by the way, this is how those are feeding their style. By creating unfamiliar things.

بس أهم شي ما تردي ع إم عمر





طبعا مزح كلكم خير و بركة و كل الإحترام و التقدير

Rain said...

Um Omar,
والله انا عارفة بس خفت تفكري إني حكمت عليكي،و بتضلي اكبر مني و الطنجرة الكبيرة بتوسع الزغيرة(هو هيك المثل؟؟:mal5oom:)
المهم
قلتلك مش اعتراضي ابدا عاللي بتحسيه انتي حرة طبعا بس انا اعتراضي على محمد اسكندر و الزلام اللي متلو
و شكرا لسعة صدرك
^_^


Saleh,
فاهمة شو قصدك
و عادة ما بتفرق معي بس انا بنغاظ لما حدا يستغل عاداتنا و تقاليدنا الحلوة حجة لتفاهتو انانيتو و عنجهيتو
هو ما بدو ياها تشتغل عشان يدللها،هو ما بدو ياها تشتغل عشان تقعد جارية عندو
دلال المرأة اللي سنو الاسلام و مشيت عليه عاداتنا لا يعني حبسها بالبيت عشان الزلمة يرضي غرورة و شعورة بالنقص
سامحني بس الاغنية دقت على عصبي!!
و ما تخاف،مش رادة
:ch:

:sc:

Um Omar said...

يعني انا طنجره كبيره :c2:
:sad:وفي حدن كان يحكيلي قلايه
ضايل حدن يحكيلي إني معلقه :c2:

Rain said...

loooool 5ls wala yhemmek...ma3la2a!


:sc:

Um Omar said...

يالله مليييييييييييييح
بتضلها " معلئه" احسن من معلكه :k:


تنباعي بالعزا,,احكي أأمين :k:

Rain said...

ameeeeeen :rgs:

Haitham هيثم Al-Sheeshany الشيشاني said...

الموضوع زاد عن حده، صح :)

Rain said...

ليش؟

Hana said...

أنا هلأ لقرأت هاد البوست
بس انا معك باللي حكيتي أنا بكرهه هاي الأغنية وكمان كتبت عنها شي نشرتوا بالمجلة اللي بكتب فيها و طبعا بتلاقي بمدونتي وبصراحة لقيت كتيير ناس ما عجبهم رأي فكتير مبسوطه انو لقيت حدا بشاركني الرأي :D

Rain said...

ahlah Hana nawarty ;)