About Me

My photo
I long for freedom, and when I get it, I don't know what I'm going to do with it, but I will surely be happy.

My Blog List

Sunday, January 22, 2012
مبارح رحت مع امي على عرس كالعادة عشان ما حدّش من خواتي رضي يروح معها

يعني ما بيكفّي انا بنتحمّل الأعراس بموسم التزاوج(اللي هو الصيف) لأ كمان بالشتا

يمكن لأنو إلي زمان مش حاضرة عرس فانصدمت بكمية الابتذال اللي شفتها
من رقصة "السلو" اللي بيرقصوها العرسان وكلهم حب وغرام لتقطيع الكيكة اللي عمرو ما حدا رح يعرف شو هالكيكة ومن ايش مصنوعة

وأول ما يطلع العريس لازم نشوف اللحوم والدهون والرخويّات وهي بتهز..وعلى قولة رجائي قواس اذا سايزك اكس لارج ليش تلبسي ميديوم؟ ينعن أبو تباً أمك

أكتر اشي بكرهو اني بضطر أسلّم عناس ما بعرفهم، وأنا بطبيعتي عندي كره فطري للناس...ويا ريت سلام بالإيد وبس لأ لازم بوسات
واذا حاولت أبعد مشان أسلّم بالإيد بس بتلقّى الجحرات من كلّ ما هبّ ودبّ

من المشاهدات الغريبة اللي شفتها مبارح بنت زغنونة لزّوزة قاعدة بحضن أمها قدامي، خايفة ومتخبية ومتشبثة بحضن أمها بطريقة كتير كيوت، لأكتشف بعدين انها هاي مش أمها ولكن الشغالة...يعني لو تشوفو الطريقة اللي كانت حاضنيتها فيها وولا معبرة أمها، جد يا حرام

وعسيرة الأطفال أحلى اشي البنات اللي بيكونوا قد اجري ونازلين يهزّوا عالبست يا معلّم..أي والله وأنا قدهم كنت أنام من السبعة المسا وأتخبى ورا امي لما أشوف حدا غريب
بتشوفهم بيهزّوا عالوحدة ونص، ونصهم ملغمطيتهم أمهاتهم بالمكياج
يعني هدول أمهات المستقبل، متأكدة انو أكبر طموح الهم رح يكون انهم يلاقوا عريس

واحنا طالعين من الصالة بسمع بنت بتقول لأمها ماما الساعة 8 ونص راح علينا المسلسل، وبعدين قالت يلا مو مشكلة بحضر الاعادة عالوحدة الصبح

واو


بعرف انو الناس بدها تفرح وتتزوج وهي طريقتها بالتعبير...بس عن جد ما بيزهقوا؟ ما بيحسوا انو ما في أي نوع من الخصوصية والتميّز بحفلاتهم؟؟
وبعرف انو اذا الله كتبلي رح يكون عرسي زي هيك ويمكن مملّ أكتر كمان
بس حبيت أقول بما اني لسا عالسيف سايد انو الأعراس بشعة كتير بالنسبة الي
ولو يصحلّي ما بحضرها ولكن هيك الدنيا

وألف مبروك للعرسان يلا روحوا

6 comments:

Finalway said...

لووول زمان ما سمعت عن احاديث النسوان هاي ..

جميع الاعراس متشابهه ...

والنتيجة واحدة ...

ونفس العذر يلا مهو مرة وحده بالعمر ...

يعطيك العافية يا رين و الدنيا نازلة زخ ومطر (:

أمل م.أ said...

ههههههههههههه
بجد نهفة
عجبتني التدوينة غير شكل
لانها زكرتني بحالي وانا بنت
كنت انا اغلب الاحيان
كبش الفداء لهاي الاعراس
وعلى رايك
لما صار عرسي
كان تقريبا نفس النسخة
شو بدنا نعمل
صدقا الاعراس صارت مملة جدا
نفس الروتين
لدرجة احيان بتتخربطي انت في اي عرس
نفس الوجوه والتصرفات
والاهم نفس الخطوات المتبعة
كيك.. بطعميها وبتطعموا
كنت اكره هاي الحركة
خصوصا لما ياكلوا من نفس القطعة لوووووول
على فكرة هاي انا ما عملتها
وبشربوا من نفس الكاسة
نفس الروتين
يا ستي
ان شاء الله يكون عرسك بجد مختلف

لك خالص الود
كوني بخير دوما يا رب

نيسان said...

تعيشي و تحضري اعراس
:(
برضو الواحد بيطلع بكم قصه حلوين
في منهم بينفع تدوينات حلوه زي هاي وفي منهم غير قابل للنشر
..بس اعرفي جنب مين تقعدي :))

Um Ommar said...

الله يرحم أيام ما اصلاتن مكنش مسموح نروح ع أعراس
إلا عرس خال أو عم
والباقي,, مش ضروري تحضري
والله يرحم ايام ما كان في ساعه محدده للتلفزيون إلنا
ويااااااااا ويلنا إزا زادوه خمس دقايق

Saleh said...

كنت أفكر حالي الوحيد إللي بيكره الأعراس، منيح إنه فيه ناس ثانية كمان.

عجبني تعبير "موسم التزاوج".. ذكرني بدروس البيولوجيا
:-)

Rain said...

جهاد
الله يعافيك يا رب والله حاسة حالي غبت سنين عن التدوين شو أخبارك؟
مبسوطة اني ضحكتك
انشالله دايما

أمل
أهلا وسهلا نورتي
شايفة بالله؟ لو عليّ ما بعمل عرس انا

نيسانة
ما فهمتش عليكي هاي بدها ايميل تشرحيلي هههههههه

عدّولة
شايفة بالله هالجيل؟
كيفك انتي يختي
:l:

صالح
لوووووول بالله ما بتحس هيك الناس بالصيف؟كلو أعراس