About Me

My photo
I long for freedom, and when I get it, I don't know what I'm going to do with it, but I will surely be happy.

My Blog List

Tuesday, September 24, 2013
سبق وحكيت عن متلازمة العروس، واليوم بقدملكم نظرية أخرى ألا وهي متلازمة البنت المثقفة
عن جد عن جد ما بعرف شو سبب ومنشأ هاي الظاهرة، بس في بنات فجأة وفي لحظة من لحظات حياتهم بيقرروا يعيشوا دور البنت الفهمانة اللي عايشة صراعات وجودية وقضايا كبيرة وفي براسها أكتر من 5 أفكار.. صدق أو لا تصدق
وبصراحة اللي بيقهر إنهم هدول البنات عادة بيكونوا فافيات وملفلفات ببلاستيك من لما انولدوا لدرجة إنهم مش شايفين الدنيا عحقيقتها وبيعطفوا عالفقراء من باب "يا حرام هدول ما عندهم فرابتشينو بكريما الشوكلا!!"1
أعراض المرض بتعملي سرطان أحيانا.. مثلاً البنت المصابة بتقرر إنها بتحب القراءة، وبتبلش تكتب ريفيو لكل كتاب "بتقرأو" ومعظمها بتكون الأسود يليق بك أو توايلايت، لا وبتبلش تكتب عربي فصحى.. منشان دينكم حلوا عن العربي بيكفيه اللي فيه، يختي اكتبي بالانجليزي اكتبي بالسنسكريتي بس سيبي أم العربي بحالو!!ا
قولوا لسة القراءة بتنبلع، لو تشوفوا لما فجأة تقرر إنها شاعرة، بتعبي الفيسبوك سطور أقل ما يقال عنها إنها قطع براز مرتبة عشكل كلمات.. جد بصير بدي أستفرغ من الأخطاء المروّعة اللي بشوفها
المشاعر المزيفة والتعابير المبتذلة ووصف المطر وهو بيشتّي عليها بس دونا عن باقي الناس وتجاربها المشوقة والشاعرية وهي بتربط رباط بوطها وعلاقتها السحرية مع الحيوانات والطبيعة وتطوعها مع المجموعات الخيرية.. كل هاد موثق في صور وستاتسات متلاحقة ومكتوبة بسذاجة مهولة
البروفايل بيكتشر بتصير صورتها وهي دايرة وجهها وبتطلع عجبل او بحر، والكفر بيكتشر دعوة لندوة مناقشة أو توقيع كتابها الجديد "الحياة والحب والربيع"1
هي الأميرة اللي بيطير شعرها مع الهوا وبتحارب الصعاب بمصاري باباها وهيك
وبصير شغلها أو أي اشي بتعملو مهمة إلهية بتخلي العالم أحسن كل يوم، ويا حبيبي لما تناقش القضايا الاجتماعية، تتلخص فلسفتها الفكرية ب: يا الله ليش هيكا زناخة
وبس هيك يلا باي أنا رايحة أتأمل المطر وأصير شاعرة ومصورة وناقدة وفنانة وقديسة
^_^


1 comments:

EvaLuna said...

Ya Weliiiiiiiiiiiiiiii this has a specific name written all over it :p